DAL GRAN DE TURCHEIS AL PIAT: LA POLENTA, NOSCIA SPEZIALITÀ

No l’é bele adinfal che la polenta l’é l biliet da vijita de nosc restorant: na magnadiva etnica, doventada de nonzech de gra a sia storia veia de sécoi. La magnadiva che raprejenta fosc miec l chiam de na vita più scempia e sana; na vita manco de corsa e olache se ge dasc più valuta al mondo natural e ai afec, a la legreza tel star en compagnìa, tel descorir robe neve e, perché pa no, ence tel magnar ensema.

La storia de chesta farina śala à reisc fone te tempes veies e veiores. De segur i omegn che vivea ti cougoi i magnaa biave che i majenaa a zeche vida anter doi pere, e medemo à fat ence le ziviltà del raion mediteran. Ma l’é stat empruma co la descorida de l’America e donca del turcheis che se à strent l leam anter polenta e turcheis. Canche ence ti ciampes del nord de la Talia se à scomenzà a coltivar biave, la polenta é doventada per sécoi la magnadiva che più da spes se portaa sora desch. E ence te Fascia no se fajea autramenter: la polenta l’era l magnar che no menciaa mai te ciasa da fech; via per l’istà se la magnaa con chel che vegnìa sù te ort, ti autres meisc con lat e formai, che vegnìa cà da la stala de ciasa. Demò te le gran ocajion, de festa, se metea sora desch mìngol de ciarn. Da spes tel passà i à cusà la polenta de esser na magnadiva pureta, massa scempia, che no ge dasc al corp dut chel che l’à debesegn. Ma no l’é vera nia: la polenta l’é n magnar che no fasc menciar nia, e de gran saor se compagnà da lianie, formai, fajei, fonghes o chel che ne sà più bon! Ma l valor più sćiantif de la polenta no l’é biot te so esser da nutriment e te le calorìs, ma l’é n muie più gran. L pael de ram e l mescol de legn, l fech, l chejer peigher e l mescedar dò e dò ne fasc recordar che te noscia sozietà olache l temp é semper pech, l moment del magnar cogn troar endò so post. Se sentar dintorn n desch à da esser n piajer per la bocia e per l cher.