na storia..... la noscia

L’era entorn la fin de l’Otcent. Na Val de Fascia che aldidanché se veit demò sun veie foto e cartoline en bianch e neigher, olache chi che no jìa a la foresta a cerir mìngol de fortuna, i proaa a soraviver con demò chel pech che dajea i ciampes.

La giava Giulia e l giaf Franzele su per i pré de Aloch - scomenz del 1900

La ge jìa coscita ence a la giava Giulia, che d’istà la pontaa demez da Poza per menar a past so doi vace su per chisc pré. Amò dalonc da la parbuda rica de la economìa turistica de anchecondì, a chi che ruaa cassù la ge sporjea n bicer de lat, na bona brama ensaorida, l’aea na bela maniera scempia e gustégola, l mus, enceben che segnà dal temp e da le struscie, l’era semper grignolent… L’era per chest che la era benvoluda dai prumes foresć che ruaa te Fascia, acà passa cent egn: saores sćiantives e ferùscoi porté dant te n saor de familia e de amicizia.

L’é mudà i tempes, la sozietà e i omegn, purampò a Malga Aloch se pel troar amò anchecondì chi saores con chi che l’a se à tout fora dai autres: na atmosfera de familia e piajégola, vejin al paìsc ma ampò sobito dalonc dal biteboi, e dapodò chi magnares scempies e bogn… dut chest da goder te na cornisc naturala che se tol fora da dut: i crepes de le Dolomiti ne varda da sora en ju e noi ge vardon sù coi eies e l cher pien de legreza e marevea. ( La giava Giulia e so vace no le é più, ma se se scouta dalvers somea de sentir amò so ciàcole gustégole e i bronsins aiegres).

Malga Aloch entorn la metà del Nefcent